عمران خان کا کہنا ہے کہ طاھرالقادری کے جانے پر افسوس ہوا ہمارے ساتھ مل کر قوم کو جگانے کا شکریا ادا کرتا ہوں۔

اسلام آباد کے ڈی چوک پر دھرنے کے شرکا سے خطاب کرتے ہوئے عمران خان نے کہا کہ طاہرالقادری کے ہمارے ساتھ نکلنے کو لندن پلان کا حصہ قرار دینا غلط ہے وہ اپنے کارکنوں کے ساتھ ہونےوالی ناانصافیوں کے باعث ہمارے ساتھ نکلے تھے جبکہ اب سچ سامنے آگیا ہے کہ نہ کوئی لندن پلان تھا اور نہ ہی تھرڈ امپائر، میں نے جب بھی امپائر کی بات کی تو اس سے مراد اللہ کی طرف اشارہ تھا۔ انہوں نے کہا کہ طاہرالقادری کے دھرنا کے مقاصد الگ اور ہمارے الگ ہیں تاہم ان کے جانے پر افسوس ہے لیکن ان کی ہمت کو داد دیتے ہیں اور ہمارے ساتھ مل کر قوم کو جگانے پر ان کا شکریہ ادا کرتے ہیں۔

عمران خان نے کہا کہ دھرنا کمزور اور مظلوموں لوگوں کے لیے ہے، قوم پر ظلم ہورہا ہے اور یہ ان کی آواز ہے، دھرنے کے باعث قوم جاگ گئی ہے اور ہم نے نئے پاکستان کی بنیاد رکھ دی ہے، عوامی شعور بیدار ہونے کا جن اب واپس بوتل میں بند نہیں کیا جاسکتا، اب گو نواز گو کرکے ہی دھرنے سے واپس جائیں گے۔ انہوں نے کہا کہ حکومت کے مظالم کے خلاف آواز اٹھاتے رہیں گے، عوام سے ٹی وی فیس کی مد میں لیے جانے والے 10 ارب کہاں جاتے ہیں ہم اس کے خلاف بھی عدالت  جائیں گے۔ ان کاکہنا تھا کہ اگر کارکنان سمجھتے ہیں کہ میں بھی واپس چلا جاؤں گا تو وہ سن لیں چاہے پیسہ ختم ہوجائے اور سب تھک جائیں لیکن میں اکیلا یہاں بیٹھا رہوں گا جبکہ جاوید ہاشمی سے بھی یہی کہا تھا کہ نوازشریف نے استعفیٰ نہ دیا تو مرتے دم تک دھرنا دوں گا۔